A SEPA establecerá procedementos de pago máis sinxelos e implantará custos bancarios máis baixos

A Zona Única de Pagos en Euros é unha das novidades legais que entrará en vigor este ano, por este motivo, o tema foi obxecto dunha charla esta tarde na CEO, celebrada grazas á colaboración con Novagalicia Banco. O vicepresidente da entidade empresarial, José Manuel Díaz Barreiros, resaltou na presentación desta conferencia o ‘factor de oportunidade deste tema, xa que entrará en vigor en aproximadamente 10 días o que demostra que desde a CEO sempre facemos fincapé en achegar puntualmente as novidades que poden afectar no día a día empresarial, co fin de facilitar a súa correcta implantación ou seguimento’.

Coñecer todo sobre SEPA, o calendario de adaptación á mesma, as vantaxes e obrigacións para o tecido empresarial e os mecanismos de pago, entre outros, foron algúns dos temas que se trataron esta tarde na conferencia ‘Zona Única de Pagos en Euros. Retos e Oportunidades na Actividade Empresarial’, da man de Manuel Rodríguez López, responsable de Cobros e Pagos de Novagalicia. Ademais de recoñecido economista e docente, este doutor en Ciencias Económicas e Empresariais pola Universidade da Coruña foi galardoado co premio ao mellor traballo de Finanzas 2011 concedido pola European Academy of Management and Business Economics.

Nesta liña, o relator encargouse de mostrar o funcionamento do novo mecanismo de pagos, as modificacións que deberán levar a cabo para adaptarse a este e os países e colectivos que se verán afectados. Engadiu que a SEPA, que entrará en vigor este próximo 1 de febreiro, repercutirá nos negocios en función do seu tamaño, distribución xeográfica e ponderaciones das formas de cobro e pago. En base a isto, expuxo as principais vantaxes que obterán as pemes, grandes empresas e os usuarios finais a partir desta normativa, como custos bancarios máis baixos ou procedementos de pago máis sinxelos. Finalmente, Manuel Rodríguez ofreceu un balance do panorama económico actual así como da evolución que tivo a política monetaria da Unión Europea desde a súa institución.