A campaña intensiva de limpeza de rúas vilagarciáns chega a Carril

A campaña intensiva de limpeza de rúas posta en marcha no mes de novembro polo Concello chega esta semana a Carril. Tras a batida realizada ao casco urbano do centro de Vilagarcía, as máquinas de varrido e baldeo de rúas e as de lavado de contedores de lixo actuarán na localidade carrilexa entre o mércores e o xoves.

O plan de traballo para o mércores, 22 de xaneiro comezará ás sete da mañá no tramo da avenida Rosalía de Castro comprendido entre os cruces de Nosa Señora dos Anxos e A Xalda. Nesta primeira pasada actuarase pola beira da rúa con números pares, e as labores de limpeza proseguirán polas rúas marie Curie, Jesús Garrido e Valentín Viqueira. Esta fase está previsto que remate ás dez da mañá para dar paso á segunda, que se prolongará ata a unha da tarde e que afectará ao tramo de números impares da avenida Rosalía de Castro que vai da confluenza da Praza da Liberdade con San Andrés, e a esta última rúa.

O xoves de 7 a dez da mañá, os operarios municipais e da empresa concesionaria Cespa encargaranse de adecentar as rúas Veiga de Lamas, Travesía da Xalda, Illa de Cortegada, Xalda e Extramuros. E a continuación pasarán a limpar as rúas Victoria, Cervantes e A Rosa.

A última xornada desta semana dedicarase a dar unha batida en profundidade á Praza da Liberdade, e as rúas A Marina, Alameda, Aduana e A Cruz, nunha primeira fase e ás rúas do Carme, esperanza, Lucena, Travesía Lucena (paralela ao Hotel carril) e Doutor Nicolás Viqueira Conde.

Como xa se fixo no casco urbano de Vilagarcía, os traballos en Carril realizaranse a través dunha avanzadilla de operarios municipais que traballarán a man na limpeza de tragantes e recollida de augas pluviais, pasando a maquinaria a realizar a limpeza máis profunda a partir do mércores. Para o correcto desenvolvemento dos traballos será preciso que os aparcamentos das zonas afectadas estean desocupados, polo que se pide aos veciños que colaboren na limpeza das rúas dos seus barrios deixando libres de vehículos os estacionamentos antes do inicio das labores de aseo.