A Audiencia Provincial desestima a excarceración de Rosario Porto contra a que hai “poderosos indicios”

A Sección Sexta da Audiencia Provincial da Coruña notificou este venres un auto no que desestima o último recurso de apelación interposto por Rosario Porto contra a decisión do xuíz José Antonio Vázquez Taín de mantela en prisión preventiva no marco da causa aberta pola morte da súa filla, Asunta Basterra Porto, na que está imputada.

No auto fundaméntase a decisión de mantela en prisión en base a que existen “poderosos indicios” contra Porto e constátase, ademais, que o “risco de fuga é importante” en atención “á gravidade da pena que puidese chegar a impórselle”.

Engade que, aínda que a posibilidade de “distorsionar ou entorpecer a instucción, manipulando testemuñas ou outros medios de proba, cada vez ha de considerarse máis remota, tampouco pode ser negada, dado o curto período de tempo transcorrido”.

O documento xudicial ratifica, ademais, que o informe da autopsia permite “seguir afirmando que necesariamente a nai da menor ou ben participou no proceso ou ben tiña que haberse decatado do seu estado, porque, segundo a súa declaración, comeu con ela e deixouna sobre as 19,00 horas en Santiago, momento no que o Lorazepán xa fixera efecto na menor”.