Universidade da Coruña e Concello de Ferrol abren o prazo do programa “Comparte” de convivencia interxeracional

O Concello de Ferrol e a Universidade da Coruña (UDC) abren dende hoxe –e durante todo o que resta de ano e o que vén- o prazo de recollida de solicitudes do programa de convivencia interxeracional “Comparte”, dirixido a estudantes universitarios no Campus de Ferrol e persoas maiores do municipio. A concelleira de Benestar Social e a vicerreitora do Campus Universitario de Ferrol, Araceli Torres. Rosa Martínez Beceiro e Araceli Torres, respectivamente, deron a coñecer hoxe as condicións que deben cumprir os maiores e universitarios que queiran beneficiarse das vantaxes deste programa de aloxamento interxeracional. As persoas interesadas nesta anovadora iniciativa,  pioneira en Galicia, poden ter máis información sobre os folletos de inscrición, lugares de entrega e condicións no Edificio Social do Concello de Ferrol –rúa Sánchez Barcáiztegui, 35-47- ou no Servizo de Estudantes do Campus de Esteiro e no Edificio de Apoio ao Estudo –avenida de Vigo s/n-.

A edil Martínez Beceiro explicou que as condicións do programa foron acordadas por técnicos municipais e do campus de Ferrol en mesas de traballo que se celebraron trala sinatura do convenio de colaboración entre Concello de Ferrol e UDC para a posta en marcha de “Comparte”. Unha comisión formada por Concello e Universidade encargarase de resolver as solicitudes que presenten tanto os maiores como os universitarios, así como de facer un seguimento da convivencia –que terá un período de proba dun mes-. A titular de Benestar Social tamén detallou as condicións que deben cumprir as persoas acolledoras. Estas son:

-Poden participar os maiores de 60 anos e menores de 85 anos, que vivan soas e sexan autómatas por elas mesmas.

-Deberán dispoñer dunha vivenda en propiedade, coas adecuadas condicións de habitabilidade e con posibilidade de aloxar ao estudante.

-Terase en conta a situación persoas, de saúde, o estado da vivenda, as motivacións e os hábitos e estilo de vida.

-As persoas escollidas serán entrevistadas e posteriormente realizarase unha visita ao seu domicilio.

E os requisitos que terán que cumprir os universitarios: que desexen participar no programa son:

-Estudantes matriculados nunha titulación universitaria do campus de Ferrol tanto nun grao, mestrado ou doutoramento; maiores de 18 anos e menores de 35, e que non sexan residentes en Ferrol ou bisbarra.

-Terase en conta a situación persoal e académica do alumnado.

-Valorarase a motivación, hábitos e estilo de vida, disposición e as contraprestacións que estea disposto a ofrecer.

Obxectivos

Pola súa banda, a vicerreitora Araceli Torres destacou a “magnífica acollida” do Goberno Municipal de Ferrol a esta proposta de aloxamento interxeracional, que ten “uns obxectivos sociais e solidarios, xa que pretende dar resposta tanto ás necesidades de compañía e apoio das persoas maiores, como ás necesidades de aloxamento de estudantes universitarios”.