Rey Varela presenta os novos vehículos municipais para a Policía Local e Protección Civil

Rey Varela na presentación do novo vehículo

O alcalde de Ferrol, Jose Manuel Rey Varela, acompañado da voceira do Goberno Municipal, Martina Aneiros Barros, presentou esta mañá os novos vehículos municipais que formarán parte da Policía Local e da Agrupación de Voluntarios de Protección Civil. Así, os axentes contarán coa incorporación de dúas motocicletas que consolidarán a unidade motorista, posta en marcha no presente mandato, e o corpo de voluntarios cun novo vehículo.

Rey Varela sinalou que estas novas incorporacións na flota de vehículos municipais “permitirán a mellora da atención cidadá que é o obxectivo da Policía Local e da Agrupación de Voluntarios de Protección Civil”. Ademais, o primeiro edil da cidade quixo agradecer a achega económica realizada pola Deputación Provincial da Coruña para sufragar a totalidade do investimento que ascende a 62.000 euros, dos cales 40.000 corresponden ao vehículo de Protección Civil e 22.000 euros ás dúas motocicletas do corpo policial.