Preséntase o calendario de 2014 “Campións galegos”

Calendario dos deportistas galegos

O secretario xeral para o Deporte, José Ramón Lete Lasa, e María Sande, relacións externas da empresa Coca-Cola presentaron, esta tarde, o Calendario 2014 “Campións Galegos”, dentro do convenio de colaboración que ambas as dúas entidades manteñen dende hai máis de tres años.

O calendario, que se repartirá neste Nadal, mostra as fotos de grandes deportistas galegos de elite como Ramiro Amarelle, campión de liga europea de Fútbol Praia 1999, 2008 e 2009; Victor Castro Mariño, prata no campionato de Europa Sub 23 2013; Víctor Bouza, 3º posto no campionato de Europa Sub 20 de Volei Praia 2009; Martín de la Puente e Félix García, subcampións do mundo junior 2013 de Tenis en cadeira de rodas; María Vilas, campiona de Europa Junior de Natación no 2011 e 2012; ademais de Lidia Mesías, Lara Cacabelos, Manuel Ángel Penas, Alejandro Fernández, María Mariño, Carlos Arévalo, Cristóbal Rodríguez, Borja Golán e Irene Martínez, campións en diversas especialidades como Fútbol Sala, Vela, Natación, Atletismo e outras disciplinas deportivas.

A Xunta de Galicia vén promovendo de xeito continuado o deporte de alto rendemento a través das axudas DGAN (Deportistas Galegos de Alto Nivel) que convoca anualmente a Fundación Deporte Galego, destinadas a apoiar aos deportistas galegos máis destacados no ámbito nacional e internacional, incentivando a súa dedicación ao deporte de alto nivel. Non en van, este ano establecéronse dúas liñas de actuación cun orzamento inicial de 300.000 euros: axudas para deportistas olímpicos e paralímpicos; e axudas DGAN, ambas as dúas convocadas o pasado mes de novembro e actualmente en fase de resolución.

Do mesmo xeito, o compromiso da Xunta de Galicia co deporte competitivo canalízase a través do programa Galicia-Río 2016, coa posta en marcha de accións para axudar aos deportistas cara aos Xogos Olímpicos de Río de Janeiro.

Así mesmo, cómpre subliñar que moitos destes deportistas de elite estanse formando no Centro Galego de Tecnificación Deportiva (CGTD), un moderno complexo deportivo impulsado pola Xunta de Galicia e que, na actualidade, dá cabida aos principais deportistas e promesas do deporte galego.