Os proxectos subvencionados por ‘Deporte Solidario’ chegarán a máis de 13.000 coruñeses

Reunión de “Deporte Solidario”

O alcalde da Coruña, Carlos Negreira, presidiu esta mañá a firma dos convenios coas 26 entidades que recibiron unha subvención da convocatoria Deporte Solidario, realizada polo Concello da Coruña a través da Fundación Emalcsa, e da que se van a beneficiar máis de 13.000 cidadáns. No acto, o alcalde estivo acompañado polo presidente do Básquet Coruña, Carlos Lamora, a presidenta da Unión Veciñal Ventorrillo, Rosa Barreiro, e o secretario e presidente en funcións do Club de Tenis Marineda, Juan Hernández Rei.

Tal e como lembrou o alcalde, Deporte Solidario é unha iniciativa pioneira que pretende favorecer o uso do deporte como instrumento de intervención social e apoiar, desta forma, o traballo das entidades deportivas coruñesas que xa viñan demostrando unha forte vocación solidaria: “Todas as entidades constituís unha importante forza da cidade: contades con máis de 13.000 socios, máis de 200 traballadores e case 600 voluntarios. Os directivos destas entidades sodes auténticos heroes sociais que dais o voso ben máis prezado, o voso tempo”, sinalou o alcalde.

Carlos Negreira explicou que a convocatoria Deporte Solidario vai entregar 250.000 euros en axudas económicas para financiar 32 proxectos que conxugan a actividade deportiva coa acción social. Un total de 26 entidades deportivas da cidade da Coruña son as beneficiarias destas axudas. Os proxectos financiados desenvólvense en diferentes disciplinas deportivas, desde o baloncesto, hockey, atletismo, fútbol sala, rugby, vea, piragüismo, pesca fondeada, waterpolo, esgrima, xadrez, tenis de mesa, tenis, halterofilia, hípica, voleibol, judo, tiro con arco e deportes de montaña.

O conxunto dos 32 proxectos presentados polas 26 entidades que obtiveron financiamento no marco da convocatoria Deporte Solidario alcanzarán a 13.374 persoas que participarán no desenvolvemento das actividades deportivas e sociais programadas polas entidades.

O alcalde finalizou avanzando que esta é a primeira convocatoria de moitas nas que se buscará chegar a máis entidades e mellorar a achega económica á vista da boa resposta das entidades e dos resultados que se esperan.