Ortigueira destinará 300.000 euros do POS 2014 a mellorar e sinalizar as pistas das parroquias

O Concello de Ortigueira reserva preto de 300.000 euros do POS 2014 que cofinancia a Deputación provincial da Coruña para actuacións de mellora da rede de vías públicas da localidade. As intervencións previstas polo goberno de Rafael Girón afectarán a 15 parroquias, e incluirán fundamentalmente actuacións de rexeneración e a optimización da señalética da zona rural.

Entre os traballos aprobados durante a reunión plenaria de onte, de forma unánime, pola Corporación Local inclúense o aglomerado en quente dun viario do núcleo urbano (a rúa Márquez Cortiñas), e a rexeneración dunha vintena de pistas que, na actualidade, e como consecuencia do tráfico que soportan a diario non se atopan en boas condicións de uso.

Beneficiaranse destas obras de acondicionamento até 13 parroquias do rural (Luía, Ladrido, Espasante, As Neves, Couzadoiro, Devesos, Ou Ermo, Senra, Freires, San Claudio, Mera de Baixo, Mera de Riba, San Adrián). Ademais, resérvase unha porcentaxe do orzamento para actuacións puntuais de rebacheo no resto de territorios da localidade.

En total, destinarase a estas obras de posta a punto que, como vén sendo habitual, dan prioridade ao acondicionamento de camiños que constitúen accesos a lugares con máis vivendas e aqueles máis transitados, un total de 262.620 euros. Trátase así de mellorar as condicións de seguridade, tanto de condutores como dos peóns que circulan de maneira habitual por estes viarios.

Señalética municipal

En paralelo, o goberno local reserva unha partida de algo máis de 36.000 para acometer un proxecto de mellora da sinalización vertical informativa municipal, un compromiso electoral que vén complementar traballos que, nesta materia desenvolvéronse durante a lexislatura anterior.

A iniciativa, que se centrará fundamentalmente nas parroquias das Neves, Ou Ermo, Insua e Devesos,  permitirá a instalación de 41 sinais de entradas a lugares e outras 30 en cruces, algo fundamental en tanto que pode contribuír, por exemplo, á rápida localización dos inmobles en caso de emerxencias.

Deste xeito, o goberno de Rafael Girón responde á demanda veciñal que reclamaba medidas encamiñadas a mellorar a identificación de lugares, xa que nalgúns puntos os sinais atópanse en mal estado e outros carecen delas.