O viveiro de empresas da Grela organiza a súa primeira xornada de portas abertas

O viveiro de empresas do Iglesario de  A Grela organiza este venres unha xornada de portas abertas para dar a coñecer as súas instalacións a todos os emprendedores que o desexen e onde os viveristas poden convidar a provedores, clientes e colaboradores para que coñezan o centro e as empresas que o integran.

A actividade, organizada pola área de Emprego e Empresa que dirixe Luisa Cid, contará coa presenza, entre outros, da maioría dos emprendedores que pasaron polo centro da Grela e de entidades colaboradoras como a Cámara de Comercio, AJE, Afigal, Igape, Asociación de Empresarios da Grela, Universidade da Coruña e Centro Mans, entre outras.

A xornada de portas abertas, a primeira que se celebra no viveiro municipal, celebrarase de 17.00 a 20.00 horas e durante ese tempo os despachos estarán abertos, haberá actividades en cada un e tamén nas salas comúns, con proxección de vídeos e a celebración de actos lúdicos para converter o acto nun encontro informal entre viveristas, empresas e entidades colaboradoras.

O viveiro do Iglesario da Grela ten doce despachos e desde a súa creación pasaron polas súas instalacións un total de 20 empresas. O Concello sempre mantén aberto o prazo de recepción de solicitudes para realizar un proceso de selección, o próximo farase a principios do próximo ano, para poder cubrir os despachos a medida que queden dispoñibles.