O técnico do Azkar Lugo, Diego Ríos visitou a alumnos de terceiro curso do colexio Franciscanos

Diego Ríos na visita aos escolares

O técnico do Azkar Lugo FS, Diego Ríos, visitou na mañá de onte luns a alumnos de terceiro curso de primaria do Colexio Franciscanos da capital lucense. Durante a súa visita o preparador lucense explicou ao alumnado como foi a súa traxectoria ligada ao fútbol sala e ao Azkar Lugo, sendo xogador e posteriormente adestrador, destacando valores moi importantes como o compañerismo e a amizade.

Ademais Ríos tamén tivo a oportunidade de coñecer o “Proxecto de Bana”, un proxecto que suscita actividades que respondan aos intereses e ás necesidades dos propios alumnos, afastándose da mera repetición de conceptos e exercicios. Actividades creativas, motivadoras e altamente significativas para dese modo optimizar o estado emocional dos nenos e así estimular as súas ganas de aprender dentro dunha contorna acolledora, dun aula que abre as súas portas á participación e colaboración de todos os membros da comunidade educativa onde os alumnos sexan promotores dos seus avances, verdadeiros protagonistas do seu proceso de aprendizaxe.

A visita finalizou coa resposta do preparador lucense a todas as cuestións suscitadas polos alumnos e coa realización de fotos e firma de autógrafos.