O primeiro Circuíto Provincial de Carreiras Populares contou coa participación de dez mil atletas

As probas incluídas neste primeiro circuíto foron a III Carreira Popular do Concello de Carballo, a CorreSan Nocturna de Santiago, a XII Mila Urbana de Ares, o XIV Maratón Popular Concello de Cambre, o Maratón de San Xoán de Piñeiro de Mugardos, a Carreira Nocturna Concello de Ferrol, o XVI Carreira Popular Santa Uxía de Ribeira, a VII ACoruña10, a Carreira Pedestre do Concello de Ames e a XXXIV Carreira Popular de Negreira.

Todas elas son probas calendadas pola Federación Galega de Atletismo, o que garante o cumprimento de todos os requisitos deportivos, e sumáronse a este primeiro circuíto tanto pola súa historia, o seu arraigo entre a poboación e unha tradición contrastada. Tívose en conta tamén que se abarcara a meirande parte do territorio da provincia e que as carreiras foran abertas a cantas categorías fose posible.  

Segundo explicou o presidente provincial na presentación desta iniciativa, o circuíto fíxose este ano a modo de experiencia piloto, xa que, segundo matizou, “a nosa idea é continuar en próximos anos, e a nosa idea é tamén abrir unha convocatoria para que calquera carreira que cumpra con todos os requisitos deportivos que esixe a lei poida entrar neste novo premio provincial”.

Modelo de puntuación

Para poder optar a algún dos premios, os participantes no circuíto teñen que, polo menos, correr en cinco das probas incluídas nel.

Así, todos os corredores que remataron unha carreira recibiron un punto e os primeiros 50 clasificados obtiveron unha puntuación extra de xeito que primeiro leva 50 puntos, o segundo 49 e así, sucesivamente, ata que o que chega no 50ª lugar, que suma un punto.

Para a organización e a coordinación das probas, a Deputación da Coruña investiu un total de 25.000 euros. Ademais, destinará outros 8.000 aos premios para os gañadores.

A entrega de premios terá lugar nas próximas semanas na sede da institución provincial.