Enviar a un amigo
Opinar
ImprimirO detido polo crime de Marín recoñeceu os feitos
O home detido en relación á morte dunha muller en Marín (Pontevedra) que foi localizada sen vida na súa casa o pasado xoves ten antecedentes por violencia de xénero cunha parella anterior, así como de violencia doméstica. Non obstante, non consta que a vítima, de 45 anos, interpuxese ningunha denuncia contra el.
Segundo informou a Policía Nacional, o detido por este suposto caso de violencia de xénero é un home de 39 anos e veciño de Marín que mantiña unha relación coa muller falecida dende hai catro meses.
Os feitos aconteceron o pasado xoves, cando un familiar da muller acudiu ao domicilio alertado por un veciño, que atopou a porta da vivenda aberta. Dentro, localizouse o corpo sen vida da muller.
Os investigadores realizaron entón investigacións na propia casa da vítima e na súa veciñanza. Así mesmo, os resultados da autopsia confirmaron este venres que a morte tiña un carácter violento.
O home foi detido na noite deste venres e, en dependencias policiais, recoñeceu ser o autor dos feitos. Este sábado presenciou un rexistro no seu domicilio, situado en Marín. Está previsto que sexa posto a disposición xudicial este domingo.
