O condutor dun turismo resulta ferido grave tras saírse da vía en Castrelo de Miño

O condutor dun turismo resultou ferido de carácter grave nun accidente de tráfico rexistrado ao sairse da vía no termo municipal de Castrelo de Miño (Ourense).

O sinistro tivo lugar sobre as 13.45 horas deste mércores no quilómetro 20,4 da estrada OU-402 ao seu paso por Castrelo de Miño, segundo informou a Garda Civil de Tráfico.

O accidente consistiu na saída de vía pola marxe esquerda do vehículo, no que ían dúas persoas, que chocou contra un noiro, segundo concretou Tráfico.

As mesmas fontes indicaron que o condutor do turismo, un varón de 41 anos veciño de Leiro, resultou ferido grave, mentres que o ocupante, un home de 46 anos veciño de Castrelo de Miño, sufriu feridas leves.