O Club de Leones entrega dúas toneladas de alimentos para as familias sen recursos de Culleredo

O Concello de Culleredo recibiu hoxe a doazón de dúas toneladas de alimentos non perecedoiros por parte do Club de Leones de Oleiros. A entidade levou a cabo durante este fin de semana unha operación quilo no centro comercial Eroski de Novo Mesoiro e decidiu contribuír cos programas de asistencia a familias sen recursos que desenvolve o Concello cullerdense.

A concelleira de Benestar Social, Lupe Pombo, desprazouse na mañá de hoxe ao supermercado para recibir os 2.000 quilos de alimentos por parte dos representantes do Club de Leones. A edila agradeceu a disposición da entidade para colaborar en dar resposta ás necesidades que teñen moitos veciños de Culleredo.

O Concello espera con esta doazón dar servizo a 100 familias do municipio que se atopan en situación de emerxencia social. A doazón componse de todo tipo de alimentos non perecedoiros, achegados polos clientes do centro comercial grazas ao traballo de 8 voluntarios do Club de Leones que organizaron a recollida.

Pombo anuncia que, de face a continuar aumentando as reservas de alimentos que o Concello reparte entre os veciños sen recursos, a festa de maiores de Nadal deste ano, en lugar de ter un prezo de asistencia, impulsará unha entrega de alimentos por parte dos participantes.

Neste caso, o Concello pedirá que as doazóns se cingan a aceite, cacao e galletas, os produtos máis necesarios actualmente. O evento terá lugar o sábado 21 ás 17.00 horas no Edificio de Servizos Múltiples do Burgo.

O Concello de Culleredo aumentará en 2014 os fondos destinados a emerxencia social nun 30% dadas as necesidades crecentes en familias do municipio. O alcalde, Xullo Sancristán, durante o pasado pleno, anunciou que si é necesario aumentar máis estas partidas durante o exercicio así o ordenará: “Variaremos o que sexa necesario, pero as axudas a familias sen recursos están absolutamente garantidas en Culleredo”.

O regulamento destas axudas de emerxencia social inclúen achegas para sufragar os alugueres de vivenda, hipotecas, alimentación, produtos de hixiene, medicamentos ou tratamentos médicos.