O Azkar recibe a un Inter Movistar que descoñece o que é a derrota

Encontro Azkar e Inter Movistar

Vitoria do líder, Inter Movistar, incontestable en Lugo. O Azkar non puido facer fronte no segundo periodo a un gran equipo madrileño que demostrou o porqué do seu liderato en Lugo. No primeiro acto iso si, os lucenses mereceron mellor premio que o 2-4 que reflectía o marcador ao descanso. E é que o partido estivo condicionado polos tres primeiros goles dos verdes, dous deles en propia porta dos galegos que condicionou moito o partido, e aínda que os lucenses intentárono no segundo periodo, o choque desnivelouse ao lado dos de Jesús Velasco.

O primeiro periodo non puido comezar peor para os azuis xa que ao primeiro minuto Ortiz aproveitaba un rexeite ao bordo do área para facer o 0-1. Ao minuto seguinte Chano puido empatar nunha xogada similar ao gol dos madrileños, pero o seu disparo non viu porta. E o Inter, prácticamente sen facer maior esforzo, víase ao minuto 6 cunha clara renda de 0-3 tras dous goles en propia porta de Jandri e Antonio Diz. Entón os pronistas reaccionaron e segundos despois Chano poñía o 1-3 tras rematar un corner no segundo pau. Os galegos plantábanlle cara ao Inter Movistar e por momentos ata os de Diego Ríos dominaban o xogo. Cos visitantes con cinco faltas, e tras cometer a sexta superado o ecuador do primeiro tempo, Aranburu lanzaba fóra un lanzamento de dobre penalti. Mendiola salvaba aos seus nun man a man ante Batería e posteriormente os lucenses tamén sumaban a súa quinta falta. O Azkar estaba dentro do partido pese á desventaxa, pero metíase de cheo co gol de Iago Rodríguez que tras pelexar un balón aproveitaba a indecisión de Luís Amado e Pola para facer o 2-3. Pero pouco lles durou a alegría aos pronistas xa que cometían a sexta falta e Batería desde o punto de dobre penalti non fallaba ante Óscar Iglesias que saltaba desde o banquiño para intentar deter o lanzamento (2-4). Luís Amado converteriase na clave nos cinco últimos minutos, xa que salvaría aos seus e deixaba sen premio o empuxe local. Primeiro detería unha dobre ocasión de Jandri e Antonio Diz e logo tapaba un disparo de Chano que se ía ao pau. Ademais Aranburu gozara dun segundo dobre penalti, pero o seu disparo novamente íase fóra. Chegábase ao descanso coa sensación de que o Azkar merecera moito máis.

No segundo periodo a historia cambiou. O Inter demostrou a súa calidade e pegada e aos poucos foi poñendo máis bases para a súa vitoria. Si xa a diferenza de dous goles era complicada para os galegos, Pola encargábase de dar o paso definitivo para os seus a 12 minutos para a conclusión anotando o 2-5. O Azkar estaba tocado, as forzas tamén flaqueaban e encima diante estaba o Inter, o líder da liga. Rivillos a dez minutos do final sentenciaba case o choque co 2-6. Aínda que o Azkar Lugo seguía pelexando e Iago Rodríguez cun tremendo zurdazo que tras pegar nos dous paus convertíase no 3-6, os lucenses non daban as mesmas sensacións que no primeiro acto. Aínda así quedaban oito minutos por diante e podería haber unha última esperanza, pero a mesma quedou desarbolada tras unha boa combinación dos verdes que acababa cun tremendo disparo de Borja que significaba o 3-7. A renda de catro goles era xa insalvable e Diego Ríos decidiu nin arriscar con porteiro-xogador. O público gozou nos últimos minutos porque viu ao seu equipo loitador pese á desventaxa e ademais presenciou o debut dun novo xogador lucense na categoría como foi Asier que xogou os tres últimos minutos do choque e o debut liguero esta tempada de Adrián. Vitoria incontestable do Inter que é máis líder mentres que o Azkar Lugo pecha a primeira volta con 12 puntos no 12º posto.

Ficha técnica:
Azkar Lugo FS 3: Mendiola, Diego Núñez, Jandri, Cuco e Chano, -cinco inicial-, Iago Rodríguez, Aranburu, Antonio Diz, Zala, Óscar Igrexas, Adrián e Asier.
Inter Movistar 7: Luís Amado, Ortiz, Pola, Batería e Ricardinho, -cinco inicial-, Tobe, Borja, Rafael, Orzáez, Rivillos, Nano Modrego e Jesús Herrero.
Árbitros: Arce Ruíz e De Juana González (comité cántabro). Amonestaron con tarxeta amarela a Diego Núñez e Iago Rodríguez (Azkar) e a Luís Amado (Inter).
Incidencias: 15ª xornada de liga en 1ª división. Palacio Municipal dos Deportes de Lugo. Uns 1500 espectadores.
Goles: 0-1 min. 1 Ortiz, 0-2 min. 3 Jandri (propia porta), 0-3 min. 6 Antonio Diz (propia porta), 1-3 min. 6 Chano, 2-3 min. 12 Iago Rodríguez, 2-4 min. 13 Batería (dobre penalti), 2-5 min. 28 Pola, 2-6 min. 30 Rivillos, 2-7 min. 32 Iago Rodríguez e 3-7 min. 34 Borja.