Malpica rexistra ventos de 118 quilómetros por hora

Malpica, Punta Candieira (en Cedeira) e a Illa de Sálvora (en Ribeira), rexistraron os momentos máximos de vento nas últimas horas en Galicia, ao alcanzar os 118,1 quilómetros por hora no primeiro caso e os 110,9 nos outros dous. No mar as ondas superaron os nove metros de altura, segundo a información de Meteogalicia e de Portos do Estado.

Ademais, ao longo da xornada de Nadal, no que se están a producir chuvias intermitentes pero intensas, contabilízanse, ata as 17,30 horas, máis de 150 raios caídos sobre Galicia. De feito, as primeiras indagacións apuntan a que a caída dun raio foi a orixe do lume que deixou practicamente calcinado o santuario da Virxe da Barca en Muxía (A Coruña).

Malia que o temporal foi remitindo, aínda estivo activada nas primeiras horas do día a alerta por fortes ventos en Galicia. De acordo cos datos de Meteogalicia, os momentos máximos rexistráronse na costa atlántica e varias estacións rexistraron ventos por enriba dos 100 quilómetros hora.

Así, en Corcubión alcanzáronse os 102,1 quilómetros por hora e en Corrubedo (Ribeira) superáronse os 108 quilómetros por hora, un rexistro similar ao de Xesteiras (en Curtis). Na Illa de Ons (Bueu) chegouse aos 102,8 quilómetros por hora.

En canto ao mar, en alerta vermella pola ondada, as ondas chegaron aos 8,44 metros en Estaca de Bares; aos 8,67 en Cabo Silleiro e aos 9,26 metros en Cabo Vilán, un rexistro marcado ás 5.00 horas.