Luís Rubido toma posesión do seu cargo como novo alcalde de Cedeira en substitución do seu irmán, alcalde durante 32 anos

Luís Rubido (PP) tomou posesión do seu cargo como novo alcalde de Cedeira (A Coruña) en substitución do seu irmán Leopoldo Rubido, que presentara a súa renuncia a principios de mes, tras 32 anos como rexedor da localidade en distintas etapas, para “dar paso a unha nova xeración”.

Nun pleno extraordinario que comezou ás 10,00 horas e durou un quince minutos, Rubido tomou posesión do cargo. Nas últimas eleccións figuraba como número tres da lista, pero o número dous, Alfredo Vilela, renunciou a ocupar o posto de alcalde. Luís Rubido foi durante esta lexislatura  portavoz municipal e concelleiro de Desenvolvemento Local, Facenda e Cultura.

Luís Rubido exercerá a partir de agora como alcalde nunha corporación na que o PP goberna con maioría absoluta con 7 edís, e na que a oposición está conformada por 4 concelleiras do PSOE e 2 do BNG.

O seu irmán, Leopoldo Rubido, accedeu por primeira vez á Alcaldía no ano 1973. Ocupou o cargo até 1999, cando foi desbancado por un goberno local encabezado polo BNG. Rubido recuperou a Alcaldía de 2003 a 2007, pero entre 2007 e 2011 a alcaldía foi ostentada polo PSOE, aínda que, de novo, recuperou o goberno local nas últimas eleccións municipais.

O pasado 5 de decembro Leopoldo Rubido presentou a súa renuncia como rexedor e edil. No seu discurso, asegurou que tomaba esta decisión para dar paso a unha nova xeración que tratase “de garantir a estabilidade” para Cedeira.

PSOE: “É UNHA FRAUDE, UNHA ESTRATEXIA FAMILIAR”

Tras a celebración do pleno, o portavoz do PSOE, José Luís Vergara, asegurou que o sucedido é “unha fraude” para os cidadáns porque Luís Rubido non se presentou ás eleccións como candidato e que a sucesión “foi ocultada” aos electores, pero que “xa estaba prevista”.

Neste sentido, o portavoz socialista afirma que non se trata dunha estratexia política senón familiar” e lembra que desde o anuncio de renuncia de Leopoldo, que ten 71 anos, deuse por feito que o seu sucesor no cargo sería o seu irmán. O exalcalde asegurara que a súa renuncia non se debía a problemas de saúde.

O portavoz socialista tamén criticou que o pleno dure “apenas dez minutos” e que a oposición “non poida intervir”. “É unha maneira lamentable de iniciar o mandato, e iso xa define que tipo de alcalde temos”.