Jorquera advirte que o encargo de Pémex sería só “un parche”

O voceiro parlamentario do BNG, Francisco Jorquera, manifestou este luns que espera que haxa “boas noticias” para o naval e que se concrete a adxudicación dos dous floteles comprometidos por Pémex con Barreras e Navantia, aínda que advertiu de que estes encargos só suporían “un parche” e non solucionarían “o problema de fondo”.

“Non vou facer de pitoniso, o que vou facer é constatar que, ata agora, Feijóo neste tema como en outros moitos é o campión de promesas incumpridos e está a punto de bater a marca de incumprimentos”, sinalou, preguntado sobre se cre que finalmente se concretará esta adxudicación, nunha rolda de prensa na que estivo acompañado da deputada Ana Pontón.

Dito isto, manifestou o seu desexo de que nesta xornada haxa “boas noticias” para o naval galego porque o BNG “nunca se suma á estratexia de canto peor, mellor”.

Non obstante, advertiu de que os estaleiros galegos precisan de moito máis que esa adxudicación para “garantir o seu futuro” e agregou que o que debe facer o presidente galego, Alberto Núñez Feijóo, é “cumprir os compromisos” da Cámara.

Por último, relatou as devanditas promesas, entre as que incluíu que se levante o veto de construción civil e a “autonomía” para os centros de Ferrolterra, así como o desenvolvemento de “Lei de sector naval que lle permitiría a Xunta estar en consello de administración de Navantia”.