Fran Alonso e Antoine Cassar protagonizan a nova sesión de Poetas Dei(n)versos na Coruña

A Concellaría de Cultura informa de que o vindeiro luns, 30 de decembro, a Ágora acolle, a partir das 20.30 horas, a terceira sesión desta nova edición de Poetas Dei(n)versos, con Fran Alonso e Antoine Cassar.

Poemas en galego e en maltés soarán na nova sesión de Poetas Dei(n)versos. Será o vindeiro luns no auditorio da Ágora, con entrada gratuíta para todo o público interesado, que poderá solicitarlles firmas aos autores participantes ao final do acto. Nesta ocasión, os autores seleccionados pola directora da iniciativa, o poeta e dinamizadora cultural Yolanda Castaño,sonFran Alonso e Antoine Cassar. Ambos cuestionaron o concepto das fronteiras xeográficas e reflexionado sobre os fluxos migratorios. Ao longo de aproximadamente unha hora, os dous autores ofrecerán unha lectura de obra propia nas súas linguas orixinais, aínda que contando tamén con tradución ao galego no caso de Antoine Cassar.

Fran Alonso é un dos escritores máis activos actualmente en Galicia: poeta, narrador, editor e xornalista, nos últimos anos a súa fama literaria intensificouse, ademais, grazas á elaboración da antoloxía Poetízate -unha exitosa antoloxía de poesía galega dirixida a escolares, que vai pola 12ª edición e hase convertidoen toda unha referencia-, así como polas súas publicacións e espectáculos de poesía dirixida ao público infantil.

O escritor e tradutor Antoine Cassar residiu en Inglaterra, Malta, España, Italia, Francia e Luxemburgo, e publica poesía maltesa, inglesa e multilingüe. O seu poema longo Passaport (2009), impreso na forma dun antipasaporte válido para todos os pobos e todas as paisaxes, foi publicado e presentado en oito idiomas e en tres continentes (incluíndo a Feira do Libro da Coruña en 2010). Os beneficios obtidos pola venda deste libro son para as ONGs locais que ofrezan asistencia legal e lingüística a refuxiados e solicitantes de asilo, como é o caso en Galicia de Ecodesarrollo Gaia.