Fomento retranquea o peche perimetral para conservar o tramo do trazado do Camiño Real en Trabanca Sardiñeira

Fomento manterá o trazado do Camiño Real ao seu paso por Trabanca Sardiñeira. A concelleira de Obras, Ana Granja, que actuou como mediadora na demanda realizada pola vecindade da zona que se opoñía á nova alternativa que lles ofrecían os responsables das obras do tren de alta velocidade, confirmou a decisión dos responsables do Ministerio.

A atención á petición dos veciños é inmediata, xa que os operarios da adxudicataria xa comezaron a retranquear o peche perimetral que comezaran a marcar. O peche móvese cara os terreos expropiados por Fomento deixando libre un paso co mesmo trazado do Camiño Real para uso veciñal.

Granja congratulouse pola pronta solución do problema e salientou a boa disposición que tiveron os responsables de Fomento e da adxudicataria dende o primeiro momento no que lles trasladou a demanda veciñal e se lles pediu unha alternativa satisfactoria. A concelleira reunírase cos veciños no lugar do conflito para comprobar o motivo das queixas e a continuación mantivo un encontro cos responsables da obra para mediar no asunto.