Ferrol organiza un curso de monitores de tempo libre especializado en artes escénicas

A concelleira de Igualdade e Xuventude do Concello de Ferrol, Verónica Casal Míguez, presentou esta mañá o novo curso de monitores de tempo libre especializado en artes escénicas. Esta actividade responde á demanda dos usuarios da Casa da Muller de recibir formación máis específica dentro do eido do tempo libre. Compre lembrar, que xa foi desenvolvida a acción formativa “Unha actividade, un risco, unha solución” que facilitada solucións, ferramentas e recursos a diferentes riscos que se poden presentar no desenvolvemento dunha actividade de tempo libre.

A edil ferrolá sinalou que o obxectivo da actividade de artes escénicas “é promover os coñecementos necesarios para os monitores de tempo libre na utilización das artes escénicas”. O curso será realizado os días 26, 27, 28, 30 e 31 de decembro, en horario de 9 a 14 horas, no Centro Cívico de Caranza. En canto ao contido da formación, estará dividida en dous bloques: un teórico, que proporcionará as ferramentas, habilidades e coñecementos necesarios; e un práctico, para poñer en práctica os coñecementos adquiridos na parte teórica.

A acción formativa buscará a implicación dos asistentes, fomentando unha participación activa, onde será parte do proceso enriquecendo o curso  e fomentando o denominado “aprendizaxe entre iguais”, metodoloxía máis enriquecedora para o desenvolvemento deste tipo de actividades. O prazo de inscrición para este curso específico en artes escénicas no eido do tempo libre será aberto mañá e concluirá o vindeiro martes, día 24. Os interesados deberán presentar a súa solicitude no Rexistro Xeral, xa que as prazas están limitadas a 20 persoas.

Novas actividades específicas no eido do tempo libre

Casal Míguez tamén informou que se está a traballar na programación para outros cursos específicos no eido do tempo libre. Estas novas actividades daranse a coñecer a principios do vindeiro ano e serán impartidos ao longo do 2014. Entre eles, atópase a especialidade en rocódromos e tirolina.