Éxito de asistencia ao obradoiro sobre a diabete en Ponte Caldelas

Vitoria Hierro Illanes protagonizou o taller que sobre a diabete organizou no Centro Cultural o departamento de Servizos Sociais do Concello de Ponte Caldelas. O numeroso público asistente coñeceu as principais características que presenta esta enfermidade, cualificada por moitos expertos como “silenciosa” ao carecer en moitos casos de alerta sintomática clara.

Debido ao limitado das prazas e a que se expediu un certificado de asistencia, os interesados tiveron que inscribirse previamente nas oficinas municipais, co fin de limitar o aforamento e facer máis eficaz o desenvolvemento deste taller.

INICIATIVA PREVENTIVA, FORMADORA E DIVULGADORA

Esta iniciativa formadora e divulgadora desenvolvida polo departamento de Servizos Sociais do Concello de Ponte Caldelas estaba especialmente dirixida a persoas diabéticas ou en serio risco de padecer esta enfermidade, familiares, persoas coidadoras e cidadanía en xeral.

Entre os contidos que se trataron neste taller estaban a actualización sobre a enfermidade, os coidados de saúde e control adecuados de glucemias e recomendacións na alimentación dos pacientes que padecen esta doenza practicamente asintomática, a cal se pode sufrir sen que un déase conta  ata que xa se atopa nunha situación moi avanzada.

Con anterioridade a este taller, celebrouse baixo o título “Envellecemento Activo e Saudable” que foi impartido por María José Lozano Lorenzo, traballadora social do Complexo Hospitalario de Pontevedra, e que estivo especialmente dirixido á poboación maior, familiares ou cidadanía en xeral.Os principais contidos dese taller viraron en torno ao adestramento persoal no ámbito da saúde, as técnicas de autoaxuda e a adecuada xestión das emocións e a tensión.