“Delafé y las Flores Azules” presenta no Jofre o seu último traballo discográfico “De ti sin mí / De mí sin ti”
A banda Delafé y las Flores Azules, presentará o sábado 14 no Teatro Jofre o seu novo disco “De ti sin mí / De mí sin ti”, dentro do ciclo “Son(S) do Jofre” da Concellería de Cultura, que dirixe Manuel Reyes García Hurtado. O concerto dará comezo ás 20:30 horas e as entradas poden ser adquiridas de maneira anticipada no despacho do teatro municipal ou a través de internet, na páxina oficial do Concello de Ferrol: www.ferrol.es (apartado Axenda Cultural).
Delafé y las Flores Azules, ou o que é o mesmo Oscar D´Aniello, Dani Acedo e Helena Miquel, chegan a Ferrol para presentar o seu novo disco, “De ti sin mí / De mí sin ti”, o segundo xunto a Dani Acedo e o cuarto dende os inicios de Facto Delafé y las Flores Azules. Neste traballo discográfico experimentan coa música e o que aporta ás letras, repetindo os temas en dous discos -un alegre e outro triste- que din o mesmo a través dos sentimentos encontrados. Ademais, tamén inclúe un DVD que recolle o viaxe en bicicleta que fixeron por Italia para depositar as cinzas do pai de Óscar D´Aniello no seu pobo natal. Os compoñentes da banda describen os seus concertos como “moi enérxicos” xa que non paran de saltar e bailar “para cargar as pilas aos asistentes”.