Comeza o programa de estimulación cognitiva para persoas maiores no Carballiño

A Concellería de Igualdade e Benestar Social prosigue, un ano mais e para este exercício 2014, comezando mañán dia 3 de decembro, o PROGRAMA DE ESTIMULACIÓN COGNITIVA PARA AS PERSOAS MAIORES do concello do Carballiño.

No concello do Carballiño ás persoas maiores de 60 anos representan un 32% do total. Con este programa trátase fundamentalmente de apoialas na planificación de estratexias para un envellecemento en positivo e activo, promover novos intereses e actividades, estimular e entrenar a vitalidade  mental e a ocupación do lecer e tempo libre en positivo.

Entre os obxectivos deste programa están:

– Propiciar experiencias de aprendizaxe nas persoas maiores e manter un contorno rico e estimulante.

– Estimular e entrenar a vitalidade mental mediante este obradoiro nas diferentes parroquias: Mesego, Partovia, Mudelos, Seoane e achegando as actuacións dos Servizos Sociais ao médio rural.

– Facer que as persoas maiores sexan as protagonistas do seu propio desenvolvemento, xerándose procesos de participación.

– Previr e paliar o envellecemento cerebral nas persoas maiores.

Este programa consiste en doce sesións impartidas ao longo de 3 meses, cunha periodicidade de unha sesión semanal de 2 horas e desenvolverase nas diferentes parroquias do Carballiño e na zona centro, impartidos póla psicóloga clínica Sandra Rodríguez Neira e outras profesionais especializadas.

No mes de decembro, terán lugar as presentacións do programa por parte da Concelleira de Igualdade e Benestar Social, Dona Purificación Alberte Iglesias, e comezarán, mañán dia 3 ás 16.00 horas na parroquia de Mudelos. A semana vindeira terán lugar nas parroquias de Señorín, O Carballiño, Mesego e Seoane, quedando por concretar as parroquias de Partovia e Santa Uxía de Lobás.

Poderán beneficiarse deste programa todas as persoas maiores de 60 anos empadroadas no Carballiño e será de carácter público e totalmente gratuito.

A súa finalidade principal é mellorar o rendemento cognitivo das persoas maiores para tratar de frear o posible deterioro cognitivo provocado pola idade, tendo tamén um compoñente social e relacional, de gran importancia, para evitar o afastamento e os problemas de depresión e soidade.