Cedeira acolle o Ránking para o Campionato galego de bádminton de veteráns

O pavillón polideportivo de Cedeira acollerá este sábado, 21 de decembro, a cita anual para ranquear aos xogadores para o Campionato galego de Bádminton de veteráns. Unha competición que arrancará sobre as 9,30 horas, con entrada libre. Xogaránse as modalidades de dobres e mixtos, dando a posibilidade de participar en individual para os xogadores que non teñan parella deportiva. E, en si mesma, esta cita será unha pedra de toque a nivel organizativo para o Bádminton Cedeira xa que, como se sabe, no mes de maio terá a honra de ser o anfitrión no Campionato de España. No evento do sábado participarán xogadores das catro provincias. En torno ao centenar de deportistas e entre os que se atopan campións e subcampións de España e de Galicia. Entre eles, os cedeireses Josefa Pérez (vixente campiona de España en doble mixto); Hilda Martínez (que, con Josefa Pérez, logrou o subcampionato de España en dobles e son campionas galegas na mesma categoría); Dolores López (subcampiona de España) e Juan Antonio Rodríguez e Santiago Freire (campións galegos de dobles masculino).