Asígnanse os postos de venda ambulante no Casco Histórico de Santiago

A Xunta de Goberno, na súa sesión ordinaria, aprobou as autorizacións de postos de venda ambulante no Casco Histórico. Ademais, informouse favorablemente á ampliación nunha hora da apertura dos establecementos hostaleiros durante o Nadal e prorrogouse o uso de dúas parcelas de Santa Marta como estacionamento de bordo. Tal como explicou a voceira da Xunta de Goberno, María Pardo, a aprobación do novo regulamento municipal de venda ambulante aconsellaba regularizar todas aquelas ocupacións de espazos públicos con postos de venda que se viñan mantendo en precario. Á vista dos informes de valoración, autorizouse a instalación de venda ambulante nos seguintes sitios:

– Venda ambulante de temporada: praza do Obradoiro, 5 postos; praza da Quintana, 4 postos; avenida de Xoán XXIII, 3 postos; e arco do Pazo, 1 posto. Todos estes serán desmontables, de 2 x 2 metros, e estarán dedicados á venda de artesanía e recordos de Santiago.

– Venda ambulante de temporada (xeados e castañas): Porta Faxeira, 2 postos; paseo dos Leóns, 1 posto; praza do Toural, 2 postos; e praza de Cervantes, 1 posto. Nestes casos, a venda realizarase en vehículos tenda.

Ampliación de horario

A Xunta de Goberno tamén informou favorablemente en relación á solicitude de ampliación de horario de apertura para os días de Nadal realizada pola Asociación Hostalería Compostela. A prolongación do peche unha hora máis afectará ás seguintes datas: 12, 13, 16, 17, 18, 19, 20, 23, 26, 27 e 30 de decembro, e 2 e 3 de xaneiro.

Recepción de obras

Outro dos asuntos abordados polo Goberno Local foi o inicio do procedemento para a recepción das obras de escavación arqueolóxica e restauración e estudio do xacemento da Rocha Forte. A piques de rematar tamén as obras de cerramento, a concelleira anunciou que se iniciarán as visitas guiadas á fortaleza no ano 2014.

Tamén se recibirán as obras de rehabilitación da edificación destinada a catalizador cultural no Parque de Belvís. Neste inmoble situarase o Centro de Interpretación de Parques e Xardíns, que ata agora estaba na Alameda.

Estacionamento de Santa Marta

A proposta do concelleiro de Seguridade e Mobilidade e á vista do informe de TUSSA, aprobouse a prórroga para seguir ocupando dúas parcelas do SUP-6 de Santa Marta como estacionamento libre de bordo. A autorización anterior era de 29 de outubro de 2009, polo que para poder seguir facendo uso destas parcelas procedía aprobar a prórroga. Seguirá funcionando de 7:00 a 19:00 horas.

Cesión de piano

Seguindo en Santa Marta, neste caso no seu centro sociocultural, aprobouse a aceptación da cesión dun piano para o mesmo polo período dun ano prorrogable. Os custos derivados desta cesión correrán a cargo da Concellería de Centros Socioculturais, en concepto de transporte e afinación, traballos que se realizarán pola mesma empresa que os fai para o Auditorio de Galicia e o Teatro Principal dúas veces o ano. Os gastos de transporte serán ao 50% entre o Concello e os propietarios.

Adhesión cultural

Tamén se aprobou a adhesión do Concello de Santiago ao convenio de colaboración entre o Instituto Nacional das Artes Escénicas e da Música e a Federación Española de Municipios e Provincias para a posta en marcha do programa estatal de circulación de espectáculos das artes escénicas en espazos das entidades locais “Platea”. Este programa permitirá traer varias actuacións teatrais ao Teatro Principal.