As bibliotecas municipais e a Aula de Natureza de Oira reforzan horarios e programación nas vacacións de Nadal

A Concellería de Educación proporá durante as vacacións de Nadal actividades para ocupar o tempo de lecer dos cativos dun xeito lúdico e formativo. A través de dous espazos municipais xa consolidados como alternativas nos períodos vacacionais, ofrécense contidos específicos relacionados coa natureza, a lectura e outras actividades.

A rede de bibliotecas municipal ofrecerá, os días 21, 23, 26 e 27 de decembro e 2, 3, 7 e 8 de xaneiro, en horario de mañá (de 11 a 13 h), sesións dinámicas e lúdicas, coa activación da imaxinación dos nenos e nenas a través de contacontos, maqueta contos, teatro, guiñoles e xogos tradicionais. Ademáis, nas bibliotecas de A Ponte e San Francisco celebrarase un obradoiro de monicreques, e na biblioteca da Carballeira un mercado de troco de xoguetes. Todas as actividades das bibliotecas están dirixidas a nenos e nenas de entre 4 e 10 anos de idade, e son gratuítas.

A Aula de Natureza de Oira abrirá os días 23, 26 e 27 de decembro, e o 2, 3 e 7 de xaneiro, en horario de mañá e tarde (de 10 a 13 e de 16 a 19 h) con diversas actividades enfocadas á natureza. Os nenos traballarán coas tres R, participarán en xogos populares, montarán árbores de Nadal e coidarán de plantas de inverno na horta. O custe da actividade -que inclúe todos os días- é de dez euros.

A concelleira de Educación, Ana Garrido, animou á cidadanía a participar, nun servizo que se amolda ás idades dos participantes, e que axuda a que os nenos e nenas se acostumen aos espazos de lectura, natureza e reflexión.