A rexedora de Ribadumia visita aos maiores de 90 anos e entrégalles un agasallo de Nadal

A alcaldesa do Concello de Ribadumia Salomé Peña comeza estes días coa tradicional visita de Nadal ás persoas maiores do municipio. A alcaldesa visitará persoalmente durante estas festas cada un dos fogares dos maiores de 90 anos que residen en Ribadumia para falar con eles e entregarlles un pequeno agasallo. Un total de 57 persoas maiores de 90 anos residen en Ribadumia.

O motivo destas visitas, segundo Salomé Peña, “é reencontrarme con todos estes veciños de Ribadumia aos que non acostumo a ver nas múltiples actividades que o concello organiza para a xente maior, xa que son persoas que habitualmente están nas súas casas e apenas saen ao exterior. O Nadal é unha época de reencontros entre os veciños e, como non pode ser doutra maneira, desde o Concello de Ribadumia queremos ter un especial detalle cos nosos maiores”.

A visita servirá, ademais, para entregarlle un agasallo coincidindo cos días previos á celebración do día de Nadal, “un pequeno detalle para homenaxear a unha xeración que fixeron moito por Ribadumia e felicitalos, posto que superar a barreira dos 90 anos é moi difícil”, comenta Salomé Peña.

Durante esta época, ademais das visitas aos máis maiores de Ribadumia, a alcaldesa tamén visita aos residentes do Xeriátrico de Ribadumia para felicitarlle persoalmente o Nadal. Así o fará nos próximos días, aproveitando as actividades de Nadal que organiza a residencia para achegarse ata alí e saudar persoalmente a todos os residentes.