A Executiva galega do PSOE intervén para tentar frear a crise en Ourense

A Executiva provincial do PSOE considera que o alcalde de Ourense, Agustín Fernández, cometeu unha falta “grave” que podería carrexar consecuencias para a agrupación local ao “incumprir” as directrices dadas o pasado día 20 en relación coa división interna do grupo socialista, o que obrigou a intervir á Executiva autonómica.

En concreto, a Executiva provincial lembra que o día 20, tras ausentarse nun pleno municipal o cinco edís do PSOE, os 40 membros da dirección ourensá acordaron pedir ao alcalde que restituíse a un dos concelleiros díscolos, Antonio Rodríguez Penín, as súas competencias, anuladas por decreto de Alcaldía.

Tamén se lle ordenou que aprazase a asemblea local prevista para última hora da tarde deste xoves. Fontes consultadas por Europa Press ratificaron que o rexedor non restituíu as competencias de Rodríguez Penín e aseguraron que tampouco teñen constancia de que sexa “desconvocada” a reunión local.

Nesta conxuntura, a dirección galega viuse obrigada a intervir e está previsto que a secretaria de Organización, Pilar Cancela, participe nunha reunión en Ourense este xoves ás 16,30 horas para evitar que as consecuencias da división interna en Ourense vaian a máis.

“Ante o incumprimento da resolución e o acordo tomado, o alcalde incorre nunha falta grave e as súas consecuencias deberán acordarse na Executiva nacional galega e na federal do PSOE, pero hai que tentar arranxalo antes”, explicou, en declaracións a Europa press, a secretaria da Executiva provincial, María Quintas.