A Deputación da Coruña concederá 30 becas Leonardo para prácticas en Alemaña

O BOP publica hoxe as bases para unha primeira fase da convocatoria, coa oferta de 10 becas ás que poderán optar persoas de entre 18 e 30 anos empadroadas nalgún municipio da provincia da Coruña e que teñan realizado un ciclo superior de Formación Profesional nalgún dos sectores de secretaría e oficina, fabricación e procesado, hostalería e restauración, sanidade ou traballo social e orientación.

Ademais, pídese un coñecemento de alemán nun nivel mínimo equivalente ao A2, non ser receptor de axudas da Comisión Europea no mesmo período de tempo e non ter recibido con anterioridade unha beca Leonardo Da Vinci.

A concesión da beca supón axuda económica tanto para as viaxes e desprazamentos desde A Coruña ata o lugar de destino como para o aloxamento e manutención. Inclúe, por outra banda, a realización de prácticas formativas nunha empresa no distrito de Enzkreis, un seguimento e control da actividade e unha preparación cultural, pedagóxica e lingüística de 2 semanas previa ao inicio das prácticas laborais.