454 alumnos de primaria da Laracha asisten ao Festival de Teatro Infantil incluído no programa de Nadal

Visita de Papá Noel na Casa da Cultura

O programa de actividades de Nadal que organiza o Concello da Laracha xa está en marcha. Hoxe comezou a desenvolverse o Festival de Teatro Infantil, dirixido a alumnos dos colexios do municipio, que se desenvolve en horario escolar na Casa da Cultura da Laracha.

Esta mañá 454 alumnos que suman os seis cursos de primaria do CEIP Otero Pedrayo da Laracha máis os de primeiro de primaria do CEIP Alfredo Brañas de Paiosaco asistiron á obra titulada Carta urxente para Máximo Toxo, de Talía Teatro.

Ao remate da obra de teatro, os nenos recibiron a visita de Papá Noel, que fixo un doce agasallo a todos os presentes.

Mañá será a segunda e última xornada deste Festival. Neste caso a obra será Dous pallasos en máis apuros, da compañía Os 7 magníficos máis un. Está previsto que asistan 326 nenos, alumnos de 4º, 5º e 6º de educación infantil do CEIP Alfredo Brañas de Paiosaco, CEIP de Caión, CEIP A Revoltiña de Soandres e EEI de Comiáns en Montemaior.