San Sadurniño convoca un concurso de murais en conmemoración dos 40 anos do colexio público

Este ano fanse catro décadas da posta en marcha do colexio público no centro de San Sadurniño. A comunidade educativa ten preparados varios actos para finais de mes entre os que se contan exposicións sobre a traxectoria do centro educativo, coloquios entre mestres e alumnos e un concerto con grupos formados por antigos estudantes. O Concello colabora na organización destes actos e, ademais, convoca un concurso de murais que premiará os 5 mellores deseños que despois se plasmarán no peche perimetral do colexio.

O concurso busca creacións novidosas e orixinais relacionadas co ensino que enchan de arte e cor as paredes grises do recinto. A convocatoria está aberta a artistas de todas as idades, quen poderán presentar ata dúas propostas nun tamaño non inferior ao A3. A técnica é libre, pero cómpre ter en conta que os bocetos deberán ter unhas proporcións determinadas que permitan despois amplialos a unhas medidas de entre 2 e 3 metros de longo por 1,5 ou 2 metros de alto.

Os deseños hai que presentalos no Concello nun sobre pechado onde, ademais da obra en pequeno, tamén se adxuntará nunha folla separada cos datos da autoría: nome e apelidos, D.N.I, datos de contacto, título da obra, técnica que se vai empregar, e, por último, as medidas reais e a escala. Tanto na parte traseira do boceto como na portada do sobre só deberá aparecer o pseudónimo do autor ou autora.

Un xurado designado polo Concello e pola dirección do CPI elixirá 5 traballos finalistas entre todos os que se presenten. Só por chegar a esta fase, cada creador levará un premio de 100 euros aínda que, iso si, deberá proverse de materiais e representar a súa obra xa a tamaño real no muro do centro entre os días 2 e 5 de decembro. Valorarase a orixinalidade, a calidade artística e, sobre todo, a adecuación dos murais ao tema proposto. Malia dar liberdade creativa, algúns dos valores que se pretenden reflectir -ademais dos referidos aos procesos de aprendizaxe e o coñecemento- son os da convivencia e a solidariedade, o respecto á diversidade, a igualdade, os dereitos humanos, o respecto pola natureza e a saúde, a paz, etc.

Dos cinco traballos que decorarán o exterior do colexio sairán os dous premiados: un co premio do xurado que levará 300 euros e outro co premio do público, elixido por votación popular e cunha dotación de 200 euros. No caso de que coincidan, o premio do público irá parar á segunda obra máis votada. Quen gañe aínda non terá rematado o traballo, xa que deberá levar a cabo un segundo mural xusto á entrada do recinto que aludirá ao 40 aniversario do colexio.

A entrega de premios farase o 10 de decembro dentro do acto de conmemoración das catro décadas de ensino no colexio público en San Sadurniño. O prazo para presentar obras ao concurso remata o 25 de novembro.