Ourense conmemora o Día Mundial en Memoria das Vítimas de accidentes de tráfico

O Grupo de Traballo Voluntario de Educación para a Seguridade Viaria do Concello de Ourense: P(A)T Galicia, ­Asociación de Prevención de Accidentes de Tráfico, e a Concellería de Tráfico e Seguridade do Concello de Ourense celebrarán mañá, venres, o Día Mundial en memoria das Vítimas de Tráfico, cun acto público que terá lugar ás 12:00 horas no Centro Cultural Marcos Valcarcel.

Nel intervirán responsables da asociación P(A)T Galicia, da Xefatura Provincial de Tráfico na provincia de Ourense, e vítimas de accidentes de tráfico, e estará moderado e presentado por Angélica Ferro, presidenta de P(A)T Galicia. O acto estará aberto ao público, con entrada libre e gratuíta, ata completar o aforo.

Os accidentes de tráfico son a causa principal de mortes por causa violenta e feridas graves no mundo. O Día Mundial en recordo das persoas que perderon a vida nas estradas eleva a atención a esta enorme escala: 1,3 millóns de mortes ao ano. Por tanto, cada día, millóns de novos familiares afectados e persoas feridas de todos os recunchos do mundo, incluíndo Europa, engádense aos millóns que xa sofren como resultado dun accidente de tráfico.

Este día foi adoptado en outubro de 2005 polas Nacións Unidas como Día Mundial en Recordo das Vítimas e Afectados por Accidentes de Tráfico, sendo un día importante, non só para os familiares e feridos, senón tamén para moitos outros que traballan na prevención de accidentes de tráfico ou quen lidan coas súas secuelas.

Desde entón, o número de países que se suman á celebración do Día Mundial crece cada ano. Este ano, os actos levan a cabo nos seguintes países: Bélxica, Croacia, Eslovenia, España, Estados Unidos, Filipinas, Francia, Grecia, Holanda, India, Irlanda, Italia, Xapón, Luxemburgo, México, Polonia, Portugal, Reino Unido, Sudáfrica, Suíza e Uganda, etc.