Os escolares de Mos visitan a mostra Minergal

Visita dos escolares

A concelleira de Educación e Participación Cidadá, Kely Monzón, informou esta mañá de que onte os alumnos e alumnas de 5º curso de Educación Primaria do CEIP Pena de Francia visitaron o museo Minergal; visita que será sucedida por outras a realizar polos estudiantes dos colexios de Castro-Mos (Mestre Martínez Alonso) e Petelos.

A actividade ‘Coñece Minergal’ promóvese entre o estudantado mosense dada a realidade de que o Val da Louriña debe a súa prosperidade e desenvolvemento en gran parte a actividade canteira. Coñecer de preto a súa transcendencia e importancia é fundamental para situar a historia da zona e a relevancia que a súa riqueza natural adquire na proxección externa.

Achegar ós escolares á súa realidade máis próxima é un dos obxectivos fundamentais da concellería de Educación, que aposta por ofertar ós centros escolares un programa que poña en contacto ó alumnado co seu entorno.

A explotación de minerais, a actividade canteira e todo o conxunto de sectores relacionados coa súa produción favoreceron o desenvolvemento económico Val da Louriña e de Galicia enteira.

Por outra banda, a recente inauguración, o pasado curso, do Museo dos Minerais de Galicia (Minergal), situado en Torneiros, pon a disposición dos escolares un recurso único na nosa Comunidade Autónoma que presenta a máis variada e completa mostra de minerais.

Por este motivo organizouse a actividade ‘Coñece Minergal’, que se procurará complementar coa visita ás canteiras de O Porriño. Para o desenvolvemento deste proxecto cóntase coa inestimable colaboración da Fundación Centro Tecnolóxico do Granito de Galicia que pon a disposición dos escolares os seus recursos técnicos e materiais.