Oleiros organiza unha charla informativa para os propietarios dos terreos no Monumento natural Dexo-Serantes

O Concello de Oleiros organiza unha charla para informar os propietarios de terreos forestais no Monumento natural Dexo-Serantes e agrarios nas súas inmediacións nos que se falará das distintas posibilidades de sacar un proveito económico a estas propiedades. A conferencia levarase a cabo o próximo luns día 25 a partir das 19.30 horas na casa do pobo de Dexo.

O alcalde de Oleiros, Ángel García Seoane, presentará as xornadas nas que varios técnicos falarán sobre as oportunidades de emprego e desenvolvemento rural nas reservas da biosfera e concretamente na costa de Dexo.

Posteriormente, sobre as 20.10 horas, Manuel Giménez Solla, enxeñeiro de Montes da Cooperativa Monte Cabalar da Estrada falará sobre o aproveitamento dos montes e os novos sistemas de xestión de terras, como o Banco de Terras de Galicia, Sofor ou a asociación de cooperativas de venda de madeira. Posteriormente, abrirase un debate e unha rolda de preguntas que porá punto final a esta charla.