O rexedor da Laracha participará na visita de estudo a Bruxelas organiza pola Fundación Galicia Europa

José Manuel López Varela, alcalde do Concello da Laracha, será un dos representantes de entidades locais que participará, do luns ao mércores da próxima semana, na visita de estudo a Bruxelas organizada pola Fundación Galicia Europa (FGE) e a Dirección Xeral de Relacións Exteriores, en colaboración coa Unión Europea (UE) e a Xunta de Galicia. Outro dos alcaldes de Bergantiños que confirmou a súa participación no evento é Eduardo Parga, rexedor de Malpica.

A viaxe enmárcase no Protocolo de colaboración entre a propia FGE e a Federación Galega de Municipios e Provincias (Fegamp) dirixido a impulsar a participación das entidades locais galegas en proxectos europeos.

O programa inclúe a participación nun seminario sobre administración local e programas de financiamento europeo e visitas ao Parlamento Europeo –guiada polo eurodeputado Francisco Millán- e á Comisión Europea –cunha charla coloquio a cargo de persoal da Dirección Xeral de Política Rexional sobre posibilidades de financiamento local a cargo de fondos estruturais 2014-2020-.

Este viaxe de traballo que o alcalde da Laracha realizará a Bruxelas para participar nunha completa acción formativa é considerada como unha excelente oportunidade para que o Concello poida aumentar a súa participación en proxectos europeos mediante un mellor coñecemento do entramado comunitario e a creación de redes de contactos con outros municipios de España e do resto de países que forman parte da Unión Europea.