O palista do Breogán do Grove, Diego Romero, analiza a súa tempada

Diego Romero non esquecerá o 2013, unha tempada “esixente, dura e longa”. O padexeiro do Breogán do Grove logrou dúas medallas de bronce no Campionato de Europa sub-23 de pista e ademais o subcampionato do Mundo de maratón xunto a Ton Campos. Ambos os dous marcáronse como gran reto poder estar na final do próximo Mundial en C-2 1.000 metros.

Diego Romero recoñeceu que “iniciei ben a tempada, cun bo estado de forma. Pero o calendario complicouse e ao final rematei esgotado. Pero foi unha experiencia moi positiva”. Aínda que recoñece que se levou “algunha decepción” en varias probas, o seu balance deportivo resulta “moi bo. Logrei cousas coas que non contaba”.

Gañar a Copa de 500 e 1.000 metros foron algunhas das súas primeiras alegrías. Sinala que “nunca antes lograra estar entre os mellores. Foi unha gran satisfacción poder conquistar eses títulos”. Outra das citas máis importantes foi no Campionato de Europa sub-23. Dúas medallas de bronce confírmanlle como un dos grandes especialistas.

Diego Romero sinala que “á medalla en C-1 1.000 metros ten moito valor. Foi complicada, pero un gran desafío cumprido”. Recoñeceu o padexeiro do Grove que non contaba con estar na final de 500 metros, pero as cousas saíron ben e puiden loitar por estar entre os mellores”.

Acudiu ao Mundial de pista na modalidade de C-2 e alí logrou ser quinto na final B. Pero móstrase inconformista. Desvela que quedamos moi preto de estar na final. Foi unha pena. Pero a experiencia foi magnífica”.

Ao final da tempada tocoulle acudir ao Mundial de Maratón xunto a Ton Campos. Lograron ser segundos, unha xesta que considera “moi importante”. Diego Romero recoñece que “xa estaba moi canso e foi Ton Campos o que tirou de min para poder facer unha boa proba. Foi outra alegría importante”.

Aínda non ten deseñado o calendario para a próxima tempada. Pero marcouse un obxectivo como prioritario. A final do Mundial na especialidade de C-2. “Sería un fracaso non estar nesa final xunto a Ton Campos”, di con rotundidade. Diego Romero, que aínda é sub-23, é un dos padexeiros galegos con máis proxección internacional.