O departamento social impulsa talleres de iniciación ao Pilates en tres parroquias

A Concellaría de Benestar Social impulsa no marco das súas actividades de dinamización sociocomunitaria un taller de iniciación ao Pilates en tres dos puntos da rede de centros das parroquias. A iniciativa arrancaría este mesmo venres en caso de que haxa demanda.

O departamento municipal, tal e como se apuntou no arranque do período de matrícula, amplía o abano de actividades coa oferta desta disciplina deportiva, destinada a mellorar a flexibilidade e a resistencia de cantos a practican, ademais de axudar a combater o estrés.

Inicialmente, e a xeito de proba, este taller de iniciación ofertarase nos centros sociais de Senra (16:30 h), Loiba (18:00 h) e A Basteira (19:30 h). A idea é activalo este venres sempre que se xunte un grupo mínimo de oito persoas que o demanden. Por iso, as persoas interesadas en anotarse deberán chamar ao teléfono 981 402542.