O Celta participa na homenaxe a Fernando Cáceres en Zaragoza

O Real Club Celta participará na homenaxe ao ex xogador celeste Fernando Cáceres que terá lugar en Zaragoza a próxima semana coa achega de varios xogadores do primeiro equipo e unha representación institucional no encontro que disputará o Real Zaragoza e un combinado de amigos do ex futbolista.

O club vigués, no que Cáceres militou seis tempadas, estará amplamente representado no partido de homenaxe que lle tributa o equipo zaragocista, primeiro destino en España do bravo central arxentino. Diversos xogadores do primeiro equipo celeste participarán no encontro, que se disputará o mércores da próxima semana ás 20.30 horas en La Romareda, onde tamén haberá unha notable representación institucional do club.

A recadación íntegra do partido, con entradas a cinco euros, irá destinada a sufragar os gastos do tratamento de Fernando Cáceres en Bos Aires. Así mesmo, “a Caixa” habilitou unha Fila 0 para quen desexe colaborar con Fernando Cáceres, no número de conta 2100 8627 99 0200111250.

Fernando Cáceres chegou ao Celta no ano 1998 procedente da Zaragoza e durante as seis tempadas seguintes defendeu con ousadía a camiseta celeste, deixando pegada na afección céltico polo seu honor e calidade. Disputou un total de 198 partidos e anotou tres goles.

En novembro de 2009, Cáceres recibiu durante un intento de roubo en Bos Aires un disparo nun ollo que a punto estivo de custarlle a vida. O Real Club Celta quere expresarlle unha vez máis o seu apoio, trasladarlle todo o seu cariño e desexarlle unha completa recuperación.