Lousame contará cun vehículo adaptado para o transporte de maiores

Os veciños e veciñas Lousame dispoñen xa dun vehículo adaptado para o transporte de maiores, cofinanciado polo Concello de Lousame e pola Axencia de Desenvolvemento Rural (AGADER), que subvencionou o 89,62% da iniciativa dentro dos Proxectos Dinamizadores das Áreas Rurais de Galicia. A alcaldesa de Lousame, Teresa Villaverde, e a concelleira de Servizos Sociais, Silvia Agrafojo, recibiron de man dos inspectores da Consellería o visto bo ao novo vehículo, que estará dispoñible para prestar os seus servizos á veciñanza de Lousame nas vindeiras semanas.

Teresa Villaverde explica que “con este vehículo proporcionarémoslles aos nosos maiores e ás persoas con mobilidade reducida un transporte moito máis cómodo, xa que dispón de nove prazas e capacidade para acoller a dúas persoas en cadeira de rodas”. Un novo vehículo que foi subministrado por Noyamovil SL e que supuxo un investimento de 32.680 euros (IVE incluído).

Este vehículo de transporte adaptado do Concello de Lousame é un Citroën Jumper Combi de 9 prazas Hdi 110 6v. Dispón de porta lateral dereita deslizante para facilitar o acceso ás dúas filas de asentos dispoñibles. Así mesmo, conta con dúas portas traseiras que dispoñen de rampla de acceso e anclaxe fixo das cadeiras de rodas, de xeito que garante a total seguridade dos ocupantes das mesmas.

Os veciños e veciñas que desexen empregar este servizo de transporte adaptado terán que poñerse en contacto co Departamento de Servizos Sociais do Concello de Lousame no teléfono 981 820 494 (en horario de 8:00 a 15:00 horas, de luns a venres) ou a través do mail: serviciossociais@concellodelousame.com. “Animamos a todos os veciños que pensen utilizar este transporte adaptado a que se informen nos Servizos Sociais e a que se apunten para poder organizar os horarios e rutas deste servizo”, sinala Teresa Villaverde.