José María Rivera Trallero é investido Cabaleiro de Honra da Orde dos Cabaleiros de María Pita

Acto de investidura

O alcalde da Coruña, Carlos Negreira, presidiu a investidura de José María Rivera Trallero como Cabaleiro de Honra da Orde Os Cabaleiros de María Pita 2013. Durante o acto, o rexedor destacou o papel fundamental que desenvolveu a familia Rivera dende que en 1906 fundou a Estrela Galicia, empresa na que hoxe traballan máis de 700 persoas.

Carlos Negreira tamén recordou o proceso de modernización que experimentou a firma e que lle permitiu seguir crecendo e expandindo a marca Coruña por máis de 35 países e numerosas cidades españolas, consolidándose como unha das mellores embaixadoras da cidade.

Por último, o alcalde gabou o labor desenvolvido por José María Rivera continuando co legado familiar e afrontando novos retos entre os que destaca a nova planta da Grela, inaugurada este mesmo ano, e que é o símbolo da renovación constante e do reinvestimento.