“Fórmate Ferrol” proporciona á mocidade cursos de formación e de búsqueda de emprego centrados nas novas tecnoloxías

A Concellería de Xuventude do Concello de Ferrol, que dirixe Verónica Casal Míguez, mantén aberto o prazo de inscrición para o programa “Fórmate Ferrol”, integrado por diferentes cursos enfocados ás novas tecnoloxías e a busca de emprego. Os interesados en participar deben recoller e entregar a súa solicitude, ata o vindeiro xoves 14, no Rexistro Xeral do Concello de Ferrol e poderán inscribirse ata un total de seis cursos por persoa. O número de prazas por curso é de 12 persoas e todos son de carácter gratuíto.

“Fórmate Ferrol” desenvolverase na Casa da Xuventude do 18 de novembro ao 29 de maio de 2014, en horario de mañá e tarde, e está dirixido aos mozos e mozas entre 16 e 30 anos que se atopen empadroados no termo municipal. A primeira acción formativa, que ten previsto dar comezo o vindeiro 18 de novembro, será a de posicionamento en redes sociais. Así, este programa inclúe os seguintes cursos de 20 horas cada un: posicionamento en redes sociais; posicionamento SEO; iniciación á programación web; community manager; medir campañas nas redes sociais; mellores aplicacións para a empresa; como converter visitas en clientes; retoque fotográfico; fotografía dixital; xestión de proxectos dixitais; video: montaxe e edición; desenvolvemento móbil: android e multiplataforma; ferramentas de software libre; descargas na rede. Así mesmo,  “Fórmate Ferrol” complétase cos obradoiros de 16 horas de duración de: web móbil;  inicio ao cloud computing; e preparación do currículo vitae e  da entrevista de traballo.