Ferrol abre o prazo de inscrición para os cativos que desexen desfilar nas cabalgatas de Papá Noel e Reis

A Concellería de Festas do Concello de Ferrol, que dirixe Susana Martínez Galdós, abre o vindeiro luns, día 25, o prazo para que os nenos e nenas que o desexen se anoten para desfilar nas cabalgatas de Papá Noel e Reis Magos, que se celebrarán o 24 de decembro e 5 de xaneiro, respectivamente. Así, aqueles pais e nais que queiran que os seus fillos sexan os acompañantes de Santa Claus ou das súas maxestades de Oriente deben presentar a folla de inscrición, ata o 5 de decembro, no departamento municipal de Cultura, situado na segunda planta do Consistorial.

Arredor de 50 nenos/as participarán en cada unha das cabalgatas, o número exacto será concretado no plan específico de seguridade que o Concello de Ferrol está a elaborar para estes eventos. Así mesmo, tamén se terá en conta o orde de inscrición para seleccionar aos acompañantes de Papa Noel e os Reis Magos. As follas de inscrición poderán ser recollidas no departamento de Cultura, no Rexistro Xeral, ou na páxina web oficial do Concello: www.ferrol.es e non poderán participar os nenos e nenas menores de 5 anos.