Excesivo castigo para o Santiago Futsal que perde ante Inter Movistar

Un instante do encontro

O Santiago Futsal deu a cara ante o líder da clasificación, o inter Movistar, que deu a volta ao marcador na segunda parte, tras comezar gañando os santiagueses cun gol de Quintela na primeira. Os santiagueses fixeron un grande esforzo, pero a efectividade dos de Jesús Velasco puido máis, e inter Movistar continúa invicto na clasificación.

A primeira parte comezou moi igualada en Alcalá, cun partido moi intenso no que ambos os dous equipos buscaron sorprender o seu rival. Os minutos transcorreron con ocasións en ambas as dúas portarías, que tiveron os seus porteiros como protagonistas facendo grandes paradas e con boas defensas que cortaban os ataques do contrario. Palomeque ou Diego Quintela, foron os que con máis perigo se achegaron á portaría defendida por Jesús Herrero, mentres Ricardinho e Batería o intentaban sobre a portaría de Raúl. Un Diego Quintela inspirado foi o encargado de inaugurar o marcador a 5 minutos do descanso tras unha gran xogada de David Pazos que cruzou ao balón a Palomeque, encargado de asistir ao propio Quintela, quen marcou con todo, poñendo o 0-1 ao descanso.

Tras o tempo de descanso, inter Movistar saíu a remontar o partido e os santiagueses aguantaron en defensa o achuchón alcalaíno. Aos 5 minutos chegou o empate tras un gol de Pola, que pegou no longueiro e se coou na portaría saíndo. Os de Santi Valladares trataron de reaccionar con algunha ocasión de perigo, pero sería Pola de novo quen daría a volta ao marcador. Seguiu intentándoo o Santiago, pero o terceiro gol dos alcalaínos un minuto despois, fixo que tivesen que arriscar con Barroso como porteiro-xogador a 5 minutos do final. Puido marcar Palomeque dende lonxe, pero sería Batería quen marcaría o definitivo 4-1 tras un sombreiro a Raúl, que non puido facer nada.

Sala de prensa

Ao finalizar o partido, Santi Valladares, adestrador do Santiago Futsal, comentou que “ao partido lle faltou que lle quitaron os 6 últimos minutos. Este o Santiago que temos que ver, cos seus sinais de identidade. Viuse un gran partido, aínda que o resultado un pouco avultado, pero me vou moi contento co traballo realizado”.

Ficha do partido

Inter Movistar: Jesús Herrero, Ortiz, Rivillos, Rafael e Ricardinho (cinco inicial), Batería, Tobe, Borja, Pola, Nano Modrego.
Santiago Futsal: Raúl, David, Barroso, Lucho e Quintela (cinco inicial), Hugo, Palomeque, David Pazos, Eloy Rojas, Chus e Pablo Tallón.
Goles: 0-1 Diego Quintela (min 5), 1-1 Pola (min 24), 2-1 Pola (min 34), 3-1 Rivillos (min 35), 4-1 Batería (min 38)
Árbitros: Díaz Rodríguez e García Hernández do colexio de Las Palmas e Tenerife
Amoestacións: Tarxeta amarela para Pablo Tallón, Eloy Rojas, Lucho, Hugo e Palomeque do Santiago Futsal e para Rivillos, Ortiz, Pola e Batería de inter Movistar.
Incidencias: Partido correspondente á décima xornada de liga disputado no Pavillón Caixa Madrid.