Dispositivo especial de tráfico con motivo da Carreira San Martiño en Ourense

A 37 edición da Carreira de San Martiño, na que se atopan inscritos máis de 11.000 corredores, provocará este domingo diversos cortes en rúas da cidade polas que transcorre o circuíto. A Policía Local ten previsto un dispositivo especial de tráfico, que inclúe varios cortes conforme evolucione a proba.

Así, desde as 7 h. a rúa Pardo de Cela será a primeira cortada ao acceso ao tráfico. A continuación, a partir das 8 h. a Ponte do Milenio e a Glorieta Nexus VI, así como os accesos á mesma serán pechados, ata aproximadamente as 14 horas.

Un segundo corte de tráfico, a partir das 10:45 afectará a todas as rúas polas que transcorre o circuíto, que ten un percorrido total de 10.000 metros. Así mesmo, modificarase o tráfico para a circulación procedente de Alfredo Brañas (desvío por Peliquín, e Avenida de Marín desvío por Alfredo Brañas).

A Policía Local recomenda evitar circular ou acceder ao circuíto momentos antes dos horarios previstos nos cortes de tráfico, e ofrece como alternativa, se fose necesario circular, facelo polos seguintes itinerarios alternativos: 

– Oira e Ponte novísimo para cruzar o río Miño.
– Polvorín-Manuel Murguía-Farixa para a zona sur-oeste.
– Barrio de San Francisco-Nosa Señora da Saínza para a zona sur-este.

A continuación incluímos as rúas polas que transcorren os circuítos, e que se verán afectadas polo dispositivo de tráfico:

Circuíto absoluto (10.000 metros; saída 11 h): Ponte do Milenio, Avenida Xesús Pousa, Praza da Estación, Avda. Caldas, Ponte Vella, Progreso, Tras Alameda, Dr. Fleming, Ervedelo, Avda. Portugal, Avda. Marcelo Macías, Avda. Zamora, Bonhome, Galicia, Fernández-Oxea, Lugo, Padre Feijóo, Colón, Moratín, Bispo Carrascosa, Praza Maior, Lamas Carvajal, Paseo, Curros Enríquez, Ponte Nova, Avda. Marín, Vicente Risco, Francisca Herrera, Avda. Santiago, Avda. Caldas, Ponte Vella e Pardo de Cela. 

Circuíto escolar (4.700 metros; saída 12:30 h): Ponte do Milenio, Basilio Álvarez, Avda. Caldas, Ponte Vella, Progreso, Avda. Pontevedra, Lamas Carvajal, Paseo, Curros Enríquez, Ponte Nova, Ribeira de Canedo, Ponte Vella e Pardo de Cela.

Circuíto cativo (1.400 metros; saída 13 h): Ponte do Milenio, Basilio Álvarez, Avda. Caldas, Ponte Vella e Pardo de Cela.