Día Internacional para a eliminación da violencia de xénero en Verín

O Concello de Verín e a Federación Provincial de Mulleres Rurais de Ourense (Femuro) programan varias actividades de sensibilización co obxecto de conmemorar o Día Internacional para a eliminación da violencia de xénero en Verín, o luns 25 de novembro, adicado este ano a María Fátima Machado Santos.

Ao longo de toda a mañá realizarase a campaña de sensibilización polas diferentes rúas e prazas da localidade, ademais coa colaboración de AEVER-CCU Verín, devandita campaña tamén se ampliará aos establecementos asociados. 

Ás 20 horas, terá lugar un acto-homenaxe a María Fátima Machado Santos, vítima da violencia de xénero na nosa localidade. Devandito acto de condena terá lugar no Salón de Actos da Casa da Cultura de Verín, e durante o mesmo, os veciños e veciñas de Verín lerán textos en contra da violencia acompañados por pezas musicais ao piano da man de María del Mar Blanco, pianista e musicóloga.

Para seguir coas actuacións en contra da violencia de xénero, e ante o aumento de denuncias, vaise a traballar coas mulleres vítimas e as súas familias a través da creación dun Grupo de Autoaxuda, dirixido pola psicóloga do Centro de Información ás Mulleres-CIM que xa está a atender a estas mulleres diariamente.

Tamén se está a tramitar o servizo de tradución telefónica para vítimas estranxeiras, recurso posto a disposición dos CIMs dende a Secretaría Xeral de Igualdade.

E ao longo do mes de novembro presentarase o IV Plan de Igualdade de oportunidades entre mulleres e homes en Verín 2013-2017, aprobado por unanimidade no pleno ordinario celebrado onte, e no que se avalía o número de mulleres vítimas de violencia de xénero en Verín e as medidas que se van tomar para os seguintes catro anos.