Deteñen a unha xoven coruñesa de 22 anos por violencia no ámbito familiar

Ás 21.15 horas do día 27, unha dotación policial procedeu á detención dunha moza de 22 anos como presunta autora dun delito de violencia no ámbito familiar. A intervención iniciouse cando a dotación foi avisada á rúa Médico Durán, onde, ao parecer, estaba a producirse unha agresión no ámbito familiar. Unha vez no lugar, os axentes observaron a unha muller na xanela dun inmoble chorando e visiblemente nerviosa que lles indicaba que a parella que estaba á beira dos policías, na beirarrúa, eran os que a agrediron. Entrevistados coa requirente, unha muller de 42 anos, manifestou que a moza que estaba na rúa era a súa filla e que a agrediu en compañía dun amigo. A discusión iniciouse cando a nai botoulle en cara á súa filla que quixese baixar á rúa, co seu amigo, sen facerse cargo do seu neno pequeno. Chegado un momento da discusión, a requirente foi agarrada do pelo, tirada ao chan e golpeada con puñadas e patadas pola súa filla e o acompañante, un home de 32 anos. Os policías puideron observar que a muller presentaba diversos arañazos en ambos os brazos. Por todo isto, procederon á detención da mencionada nova  e o seu traslado a dependencias policiais xunto co home antes citado e puxeron os feitos en coñecemento do xulgado de garda por si houbese algunha outra conduta de ser constitutiva de delito. Trasladouse á muller agredida á PAC da Casa do Mar para ser atendida e, posteriormente, a dependencias policiais para formular a correspondente denuncia.