Comeza en Ferrol un curso de alfabetización dixital

A concelleira de Benestar Social, Rosa Martínez Beceiro, informou que o vindeiro martes 5 dará comezo o curso de alfabetización dixital, enmarcado dentro do Plan de Oportunidades posto en marcha polo Goberno Municipal de Ferrol. Esta actividade formativa contará coa participación de 20 persoas e será impartida en dous grupos, de 10 persoas cada un.

O curso, cunha duración de 25 horas por grupo, terá lugar de luns a venres en horario de maña na Academia Postal, situada na rúa Méndez Núñez. O primeiro dos grupos realizará a formación do 5 ao 18 de novembro, mentres que o segundo será do 19 de novembro ao 5 de decembro. Este curso de alfabetización dixital contará con contidos en torno ao coñecemento de Microsoft Word e a busca de emprego a través de internet.