Catoira convoca un curso básico de prevención de riscos laborais para desempregados

O Concello de Catoira informa que está aberto o prazo de inscrición nun curso básico de prevención de riscos laborais dirixido a persoas desempregadas do municipio.

O departamento de Emprego e Desenvolvemento Local programa esta acción formativa orientada a mellorar as posibilidades de incorporación ó mercado laboral, dado que a destrución de emprego é unha das máis graves consecuencias da crise económica que estamos a vivir. Nos últimos tempos, cada vez máis empresas esixen para a contratación de traballadores formación específica en materia de prevención de riscos laborais, polo que, o Concello anima a tódolos desempregados do municipio a inscribirse neste curso homologado, que terá unha duración de 60 horas lectivas.

O número de prazas dispoñibles é de 15. As persoas interesadas nesta actividade deberán inscribirse no Departamento de Emprego do Concello antes do 31 de decembro. O alumnado deberá aboar unha cota de 10 euros en concepto de matrícula, subvencionando o Concello o importe restante do custo do curso.