As obras da EDAR de Ourense provocarán un corte no paseo das Ninfas

As obras de actuación “Mellora do saneamento de Ourense, Estación Depuradora de Augas Residuais (EDAR)”, provocarán esta semana, durante os días 6 e 7 de novembro, o corte ao acceso dos viandantes ao Paseo das Ninfas, na marxe esquerda do río Miño. O corte realizarase para garantir a seguridade dos viandantes, mentres se realizan catas para localizar a condución existente e a execución da tala das árbores afectadas.

As obras son resultado dun convenio asinado pola Sociedade Estatal “Aguas de la Cuenca del Norte, SA”, a Xunta de Galicia e o Concello de Ourense para a execución e explotación das obras da actuación mellora do saneamento de Ourense, EDAR de Ourense.

O investimento das obras é de 49 millóns de euros, cofinanciados por tres administracións; 36.750.000 por parte da Administración Central, a través de Acuanorte, 10.109.000 por parte da Xunta de Galicia e 2.141.000 por parte do Concello de Ourense.

 O obxectivo da actuación é a construción e explotación das infraestruturas necesarias para completar e modernizar o sistema de depuración da cidade, mediante:

– A construción dunha nova depuradora, con capacidade de tratamento suficiente para satisfacer as necesidades de 350.000 habitantes equivalentes, o que supón o triple de capacidade da instalación actual. Poderá tratar completamente un caudal de 4.238 m3/h de augas residuais

– Prolongación do actual colector ata o bombeo de auga bruta da nova EDAR

– Demolición da actual depuradora

– Recuperación ambiental e paisaxística da marxe esquerda do río Miño, onde se ubica a planta, unha vez demolida a depuradora actual.